關於跑馬仔麻雀計分
呢個網站係咩
「跑馬仔麻雀計分」係一個免費嘅手機網頁工具，專門幫打跑馬仔（碰槓牌）嘅朋友計數。唔使裝 App、唔使登記，打開網頁就可以開枱：一部手機負責記分，其他人用一條秘密連結喺自己手機同步睇分；打完一撳「收皮」，系統即刻計好邊個要交幾多畀邊個。
為咩要整
跑馬仔同一般計番麻雀唔同：槓要即時找數、自摸有獎馬、有啲枱仲會玩鬥地主或者一炮多響。以前我哋成日用紙筆或者手機記事簿計，一晚落嚟數字又亂又易錯，打完仲要花時間逐個對數。
所以我整咗呢個工具，目標好簡單：
- 快：撳座位 → 揀食糊或者槓 → 確認，兩三下就入完一鋪；
- 清楚：每人總分、上一鋪輸贏、連勝、出銃一眼睇晒；
- 公平透明：全枱人都可以喺自己手機睇到同一個分數，唔怕有人計錯；
- 執生：打錯可以還原，揸機嗰個要走可以用換機碼交畀第二個人繼續記。
適合邊啲人
- 屋企、朋友聚會打跑馬仔、碰槓牌嘅牌友；
- 想每鋪即時記低、打完即刻出找數表嘅人；
- 三人或者四人枱都得。
本網站只係計分工具，唔涉及任何真錢交收，亦唔鼓勵賭博；分數點樣處理由各位自己決定。
主要功能
- 注碼預設（1/2、5/10、10/20、50/100、100/200）或自訂槓、食糊、獎馬；
- 自摸、出銃、一炮多響、包自摸、三種槓、流局；
- 可選開鬥地主（追／被追）；
- 秘密連結同步：主家記分，其他人只睇；
- 換機記分：6 位數換機碼，新手機即刻接手；
- 廣東話語音報分、動畫同震動提示（每部機自己揀開唔開）；
- 還原／重做、擲骰、換位、改名、統計、詳細紀錄；
- 收皮找數、WhatsApp 過數文字、戰績圖、唯讀賽果頁。
詳細用法可以睇規則教學。
姊妹網站：香港麻雀計分
如果你打嘅係計番嘅港式麻雀（3番4、二五雞、全銃半銃、半辣上／辣辣上），請用姊妹網站 香港麻雀計分 hkmahjong.app。兩個網站同一個作者、同一套同步方式，但計分規則各自獨立。
私隱
我哋唔設帳戶，唔收集你嘅真實身份。同步牌局紀錄會喺最後更新後 30 日自動刪除。詳情請睇私隱政策。
聯絡
有建議、發現計錯或者想加新玩法，歡迎電郵：marjoruse@gmail.com
由香港個人開發者 CK 製作。