跑馬仔／碰槓牌完整規則同計分教學
呢頁講咩
跑馬仔又叫碰槓牌，係香港同珠三角好常見嘅朋友聚會玩法。佢同「計番」港式麻雀唔同：重點唔係數番數，而係食糊、出銃、槓同獎馬即時找數。各區、各柯規矩可以略有出入，所以開打之前對清楚注碼同計法，比事後嘈邊個計錯更加重要。
「跑馬仔麻雀計分」係一個專為呢套玩法而設嘅手機網頁工具。你可以喺 https://paumajai.com 開柯、記分、同柯友用 WhatsApp 分享秘密連結同步睇分。下面呢份教學，係本網站預設採用嘅計法說明，方便你同朋友對齊；注碼全部可以喺開柯時改。預設注碼係槓 10／食糊 20／獎馬 20。
使用教學（由開柯到收皮）
教你點樣由開枱用到收皮。
跑馬仔計分規則（本網站算法）
解釋本網站點樣計跑馬仔（碰槓牌）嘅數，等你同枱友開打之前可以先對好規矩。
第一部分：使用教學
1. 開枱
- 用手機打開 www.paumajai.com，撳「即刻開枱」。
- 揀注碼預設，例如「10/20」即係槓 10、食糊 20、獎馬 20；想自己定就撳「自訂」，逐項改槓、食糊、獎馬。
- 揀 3 人或 4 人，改玩法名稱（例如「星期五枱」）。
- 需要鬥地主就打開「鬥地主（追）」開關。
- 填座位名（可以留空，會用東家、南家等代替）。常用設定可以撳「存做我嘅玩法」，下次一撳就用。
- 撳「開始」。系統會即時產生一條秘密連結。
2. 分享畀同枱朋友
開枱之後頂部會見到分享列，撳「WhatsApp 分享」或「複製連結」，丟入你哋個 WhatsApp 群組。朋友撳開連結就會見到同一張枱，顯示「只睇」，分數會自動更新，遲啲先入嚟都睇到最新分數。
小貼士：秘密連結只應該畀同枱人。公開分享戰績時請用「戰績圖」或「唯讀賽果頁」，佢哋唔會帶私人牌局連結。
3. 記分
- 食糊：撳食糊嗰位嘅座位 → 「食糊」→ 揀「自摸」或「出銃」。自摸再揀獎馬數（0 至 4）；出銃就揀邊個打出。畫面會預覽每人輸贏，確認就入數。
- 槓：撳槓嗰位 → 「槓」→ 揀「明槓（打出）」「明槓（加槓）」或「暗槓」。槓即時計數，但唔會完局。
- 流局：撳枱中間「流局」，分數唔變，已計嘅槓照計，進入下一局。
- 鬥地主：開咗開關之後，撳座位會多咗「追／被追／鬥地主／被鬥地主」，揀對象（某一位或全部人）同金額。
- 打錯：撳左上角 ↩ 還原，↪ 重做，最多可以還原 40 步。
座位上會顯示總分、上一鋪輸贏，仲有「上局贏」「上局出銃」「連勝」等標記。
4. 語音報分同動畫
撳頂部 🔇 變成 🔊，就會用廣東話讀出「東家自摸，獎馬二」「南家食糊，西家出銃」等。語音、動畫同震動都係每部機自己揀，主家入數之後，其他人部機會同步播放（只要佢哋自己開咗）。部分手機要先撳一下畫面，瀏覽器先允許發聲；如果冇粵語聲，請喺手機「文字轉語音」設定下載廣東話語音。
5. 換機記分（揸機嗰個要走點算？）
- 舊手機（主家）撳右上「⋯」→「交出記分（換機碼）」，畫面會顯示 6 位數字。
- 新手機打開同一條秘密連結，撳「⋯」→「我嚟記分（換機／換人揸機）」，輸入 6 位數。
- 成功之後新手機變主家，舊手機自動變返「只睇」。
換機碼 10 分鐘內有效，用完即廢。如果只係主家自己關咗網頁，用返同一部手機、同一個瀏覽器開返條連結就會自動還原主家身份。
6. 收皮找數
打完撳底部「收皮」，會列出每人輸贏同「找數計」：系統用最少轉賬次數計出邊個交幾多畀邊個。可以撳「WhatsApp 過數文字」直接貼落群組，或者整「戰績圖」「唯讀賽果頁」分享。
第二部分：跑馬仔計分規則（本網站嘅算法）
跑馬仔各區玩法唔同，本網站用以下算法，全部數字都可以開枱時自行設定。下面例子用預設「10/20」（槓 10、食糊 20、獎馬 20），四人枱。
食糊
每一份「糊錢」＝ 食糊注碼 ＋ 獎馬注碼 × 馬數。
- 自摸：其餘每位各付一份。例：自摸 2 馬，一份＝20＋20×2＝60，三家各付 60，自摸者收 180。
- 出銃：只由出銃者付一份食糊注碼，出銃唔計獎馬。例：出銃者付 20。
- 包自摸（可選）：開咗之後，出銃當自摸計，由出銃者一個人付晒其餘人數嘅份數（四人枱付 3 份，即 60）。
- 一炮多響（可選）：同一隻牌多人食糊，出銃者逐位各付一份。
槓
- 明槓（打出）：邊個打出嗰隻牌，就由佢一個人付 3 份槓錢。例：付 30。
- 明槓（加槓）：其餘每位各付 1 份槓錢。例：三家各付 10，槓者收 30。
- 暗槓：其餘每位各付 2 份槓錢。例：三家各付 20，槓者收 60。
槓係即時找數，入完槓牌局繼續，唔會跳局。
流局
分數唔變，之前嘅槓照計，局數加一。
鬥地主（追）
開咗開關先會出現。「追／鬥地主」係行動者收錢；「被追／被鬥地主」係行動者俾錢。可以揀同某一位一對一轉，或者同其餘每位各轉一次，金額可以一撳用「食糊」「槓」「×2」預設，亦可以自己輸入。
三人枱
算法相同，只係「其餘每位」變成兩位；例如自摸時兩家各付一份，包自摸時出銃者付 2 份，加槓兩家各付 1 份、暗槓兩家各付 2 份。明槓（打出）仍然係由打出者付 3 份槓錢。
改注碼
打到一半可以喺「設定」改注碼，新注碼只影響之後嘅鋪數，已經入咗嘅分唔會重計。
有任何計法同你哋枱唔同，歡迎電郵話我知：marjoruse@gmail.com。打港式計番麻雀？請用姊妹網站 香港麻雀計分。
想睇具體數字，請轉去計分例子。想學計番拆搭，見麻雀教學。如果想知開柯、秘密連結、有冇登入等，請睇常見問題。
本網站只係計分工具，唔處理真錢交收，亦唔鼓勵賭博；分數點樣兌現由各位自己決定。